Students and Youth

Mumbai khawpui hi tunhma atanga University tha thut hmun a nih avangin leh India ram Commercial capital a nih avangin thiamna sang zir nan leh business lam hawi thil zir thiamna umzui duh mi tam takin an pan thin a, chung zingah chuan Mizo nula leh tlangvalte pawh an tel thin. India rama Colleges leh School tha ber ber te zinga chhiar phak te a awm nawk a ni. Amaherawhchu, admission reng reng hi marks percentage ena lak a nih tlangpui thin avangin zirna tha zual ho hi chan a harsa em em a. Tin, chubakah hostel nei hi an tam lova. Inluaha khawsa tur chuan Mizote neihin a tlin fo lova. University lamah hian Arts subject la duh tan tlema thil a zia awm avangin leh hostel te an lo neih that avangin kan nula leh tlangvalte engemaw zat an in hnim phum ve thin a ni.

Tun hma atangin nula leh tlangval fel tak tak te an lokal tawh thin a. Zirna lama hlawhtling tha takte pawh an awm ve thin. Tin, tunhma deuh atanga kan record enin a tlangpuiin kan nula leh tlangvalte Mizo khawtlang tan an fakawm hle thin a. Tin midangte tana hnawksak leh mawi lo taka khawsa thin kan nei zen zen lo bawk a ni. Tin, thalai hnathawk hi kan pung ve tial tial a. Hei hi hmasawnna lantirna dik tak a ni awm e. Mumbai Mizo zirlaite leh thalai hnathawk than dan hi tawitein lo tar lang ila:

Mumbai Mizo Association (MMA) hi Mumbai khawpuia Mizo zawng zawngte lo funkhawmtu leh nu leh pa chan lo changtu a ni chho reng a. He pawl hian fel takin mi a enkawl a ni. Lokal tharte hi uluk fein lawmluhna inkhawm leh ruaithehna te a neih pui thin a. Tunhnai kum 2002 atang phei chuan zirlai lo kal thar, naupang ve tak tak te, he khawpuia an him leh hlim taka an khawsak theih dan tur te, midangte nena an awmdan tur kaihhruaina te leh zirlai an nih chuan an awmdan tur leh fuihna te uluk taka lehkha buatsaih chu pek thin an ni a. A copy hi an nu leh pate pawh pek an ni.

Tin, Mumbai Mizo Association bakah hian a sakhuana lam enkawltu pawl, Bombay Mizo Christian Fellowship (BMCF) hi a awm leh a, kum 1985 daiha dinin vawiin ni thlengin Sunday tlai inkhawm hi chatlak miah lovin a la kalpui a ni.

Mizo Students & Youth of Mumbai (MSYM)

Mumbai Mizo khawtlanga chanvo pawimawh an chelh chhoh zel te enin leh nakin zel atan kan thalaite (zirlaite leh hnathawkte) hi kan khawtlang nun min chelhtu tak tak ni chho zel tura beiseina te, sakhuana lamah pawh an tangkaina chhawr bawk chho zel tura buatsaih nan kum 2004 khan MSYM hi din a ni ta a. Chutichuan, Mumbai Mizo khawtlang chu lungthu pathum ang deuhvin suihfin a ni a. MMA hian khawtlang enkawl pahin a khai khawm a, sakhuana lam enkawl turin BMCF a awm bawk a, chutichuan, MSYM hian MMA leh BMCF te hmui telin thalai lamin anmahni hawi zawng- zirlaite mamawh leh thalaite mamawh hrim hrim hi an enkawl thin dawn a ni. He pawl (MSYM) hi a lo thang duang chho anga a, a hming hi mite hriat fo a la ni dawn a ni. Keimahni chhungkua kan inthurual that fo theih nan he pawl pathumte hmanga intelkhawm fo hi kan thatna ber tur niin Mumbai Mizote chuan an hria a. Chutichuan, tun hun atan chuan Mumbai Mizo khawtlang mamawh (damlo lokalte tiamin) phuhruk turin heng pawl 3 te hi an tawk hle a ni.

Kum 2007-08 atana hruaitute chu hengte hi an ni.

Committee members:
Nl. F Lallianpuii, Tv. R. Lalnunpuia, Tv. Rosema Colney, Tv. TBC Lalvenchhunga, Tv. James C Lalremruata