Bhagvad Gita Mizo tawngin

News: Sep 5, 2009 : Engemaw lai khan hindu sakhua thehdarh tuma hmalatuten an lehkhabu pawimawh ber pakhat Bhagavad Gita chu Mizo tawngin an let zo vek tawh tih Zozam Weekly-in a hria a, hun engemaw chen hnu, tun hnaiah khan he lehkhabu hi neih theih a lo ni ta. A buatsaihtute thil tum lam ngaihtuah lem lo pawhin sakhaw lehkhabu pawimawh tak mai a nih avang hrim hrim pawh hian buaipui tham chu a ni ve awm e.

'Gita' Mizo tawng hi phek 209-a chhah a ni a, a kawm khawng niin, copy 1000 chhut a ni. A kawm khawng, phek 209-a chhah chu Rs 20 man lek a ni thung!

Mizo tawnga letlingtu hi Ramthanga Khawlhring a ni a, Heritage Foundation (Guwahati) chhuah a ni. Kum 2007-a chhuah niin a bu-ah hi chuan a inziak.

He sakhaw lehkhabu-ah hian thuhmahruai ziak an awm nual a, chungte chu Nunna Lalhnam mi leh sate vek an ni. Anni bakah hian a chhuahtu Heritage Foundation aiawhin Prof. Raghudev Goswami leh a letlingtute'n an ziak bawk.

Gita hi philosophy leh literature lamah pawh duai lo tak mai, chutiang atana zir tham chu ni mah se a buatsaihtute hian chutiang chu an tum a nih lohzia leh Hindu sakhaw thehdarh tumna hmanrua a nihzia chu thuhmahruai ziaktute tawngkam atang hian a lang chiang viau a ni.

A letlingtu Ramthanga Khawlhring chuan, "...he lehkhabu-a thute hi lei leh van innghahna, Chatuan Minung Thuchhuakte an nih avangin, a neitu Chatuan Minung hnenah lawm takin ka hlan let e," tiin thuhmahruai tlang a kawm a ni.

Rorelliana, Lal puithiam, Mizo Hnam Sakhua pawhin, "Ram leh hnamin a nun kawng dik a zawh a, hnam a lo hmuingilna tur leh mihring hriatna piaha Chung Khuanu - Khuavang ram rel, hnam hnena pholan a duhnate hailanna lehkhabu chhuah a lo ni ta mai hi hnam vanneihna kawng hawngtu lo ni zel sela," tiin malsawmna a ziak.

"Gita bu hi uluk takin ka chhiar a, hnam damna tling thu hluin a khat ni berin a lang," tiin H Chawngpianga, Lal puithiam, Nunna Lalhnam pawhin malsawmna a ziak.

C Vanlallawma, President, Janajati Vikas Samiti, Mizoram pawhin 'Duhsakna thuhma' tiang hian a ziak:

"He lehkhabuah hian engkim dintu leh duang chhuaktu, thil tinrengte nih phung ruatsaktu, chatuan minung khuavang-in hring fate nun kawng a lo rel dan leh hman chhuah dan tur fiah takin tarlan a ni a. Nung tinreng hmanga inpuang 'Khuanu' chu khawvelin an hmuhfiahna tur lehkhabu tha tak ni turin duhsakna ka hlan bawk e," tiin.

Gita thuhmahruaia hnam tinte malsawmna ziaktu B Lalthlengliana, Vice Chairman, Nunna Lal hnam (Saron veng, Aizawl) chuan, "Lalpa (khuavang) chu Lal a nih anga a inpuannate chunga a ropuina chu lang zel se, hnam tinte a siam anga mahni nih dan theuhva a kohna hretute malsawmin awm se..." tiin a ziak.

Source: Zozam Weekly News

Views: Mizoramah hun rei tak atang tawh khan sakhaw dang, a bikin Hindu sakhua theh darh tumna thuthang a awm tawh thin a. Kohhran hrang hrang te pawhin a darh zau zel loh nan hma an la nasa hle a.

Hetih mek lai hian Hindu sakhaw lehkhabu pakhat Bahgavad Gita Mizo tawng ngei mai a rawn published a ni tih han hriat hian leh a thuhma ziak tu te thleng mai a Mizo hming a han langte hian kan Kristianna hi a him chiah tawh lo tih chu a ti lang chiang hle in a lang.

Kum 2003 atang tawh khan Synod hnuaia Research and Evaluation Wing chu mawhphurhna hlan an lo ni tawh a. An ni hian Mizo Hindu sakhua a inlet an lo awm ngei a ni tih an fin fiah tawh bawk a ni.

Mizo web portals hrang hrangah a lang hnem hle a. Ngaih dan phir tak tak te an ni hlawm a. Amaherawhchu India ram hi sakhaw zalenna a nih miau avangin dan kalh a thil tih eng mah a awm chuang lo he lehkhabu leh lin a nih vang ringawt hi chuan.

En nawn ngai pakhat chu, hetia Hindu sakhaw inzirtirna bu a lo chhuah takah hian enga ti nge heti em em a kan hlauhthawn bik ni? Keini pawhin state dang dangah missionary kan tir chhuak ve tho a. A hausa lam aiin a rethei leh hnufual lam kan target zel rih bawk a.

Tuna Hindu a inlet te hi rethei leh ther hlo um vanga kan chhuah dawn anih chuan a dik bik lo ang a. Tin, nek chepna lam hawi zawng emaw, diriamna nen a kan bei zui a nih chuan kan thiam bik hauh lo ang.

State dang a kristian te tawrhna hi hre reng i la. An mahni ang chauh kan ni ang tih a hlauhawm khawp mai. Kan ngaithei lo mai ang tih a hlauhawm.

Vai rama Hindu thenkhat thiantena an sawi ka hriat fo thin chu, "Krisian te chuan sum in an thlem a, thawmhnaw tha tha te an pe a, chu bakah sikul tha leh boarding ah te a thlawnin zirna n tum sak a" tih hi an tan hmun a ni thin.

A dikna chen a awm hian ka hre ve tho thin a. Kha tiang chang pha ve lo, rethei ve bawk si ten a thenawm berh ve tak thin mai, harsa ve tak thin te khan an fate sikul tha ah kal tirin chhungkaw dinhmun an lo san phah takah chuan an thik thin a lawm.

Kei ni pawh hi chutiang chiah tur chu kan ni in ka hria. A hausa leh awm thei deuh te chuan inlet ta pawh ni se tawngkam phungin kan sawi mai mai emaw a ni ang a. A rethei a te bawk tan khan a nia huatthlala awm leh dawn ni. Thenawmpa berh ve tak kha Hindu a lo nih takah chuan sum a lo nei ta phian pawh a ni thei e, chutih hunah chuan vai rama kan missionaries te leh ring thar te dinhmun ang hi an chang ve mai lo maw Mizoramah hian?

Uluk takin Kohhran tin in ennawn i la. Sum leh pai piah lamah hian kan kohhran mi leh sa te hi an dinhmun te pawh hi chawikan dan i ngaihtuah tlang zawk teh ang. Retheihna hian mihring te hi a dawi a hneh teh a sin. Kristian ni ve si, mahni Thurin hre lo kan tam tawh em hi!

Malsawmna kan dawn te hi mi dang te tan a ni tih hai lo i la. Hausa leh rethei tual kan chai za theih hma chuan lungawi lo te tan kawng dang a inhawng zel thin. Sawrkar kutah ngawt dah loin ram leh hnam kaihhruai na kawngah pawh kohhran hian nasa takin mawhphurhna a nei tih hi inhria se la.

Ei ru leh thawhchhuah inphu lo tak tak te hian Nilai zan thupui te hi hawng fo lo se la emaw veng kil khawr taka mi khan Pathian ram a pek theih loh chhan kha ngaihtuah ta zawk se. Tun ai chuan hma kan sawn ngei ang le.

Dawhtheihna kan neih a pawimawh tak zet zet a ni tun ang hunah hian.

Post your Views/Comment here