Manipur Ah Thil Man La Sang Hle, Buaina In Rehlam Pan Dawn Em?

June 14, 2010: All Naga Students’ Association (Ansam) huaihawt Manipur a ei leh in luhna kalkawng dangchah (Economic Blockade) a la ni zel chuan mipui nun a ti chep chho hle zel a. April11, 2010 zanlai a Ansam in National Highway-39 (Imphal-Dimapur) leh NH-53 (Imphal-Silchar) dangchah hna an beihtan hi Manipur Chief Minister Okram Ibobi Singh a Sawrkar in tribal district a Autonomous District Council(ADC) inthlan a rel duhlohzia lantirna a ni. Tribal te dikna hi ADC hian a rapbet ani an ti. Hei mai bakah hian Manipur Sawrkar in June 7 a Ansam President David Choro leh United Naga Council (UNC) President Samson Remei te luman Cheng Nuai khat a neih tir chuan boruak a chhem alh hle anih kha. Buaina ti punlun bertu a ngaih chu Muivah an Somdal (a pianna khua Manipur ami) hemi buai lai kher a tlawh a tum kha Manipur sawrkar chuan a remti lo kha a ni.

He Economic blockade thla hnih chhung zet neih a ni tawh hi mipui in an tuar hle a. LPG gas cylinder pakhat man pawh Rs 1800 a lei a ni a. Hmun thenkhat ah phei chuan Rs. 2500 te pawh in lei ani. Artui lei tur a awm meuh lo a, tun ni hnih vela tang khan artui plate khat Rs 150 te in lei tur chu a awm. Petrol Litre khat Rs 100 in lei theih ani ta a, kar hmasa lam kha chuan Rs 170 in an lei. Nagaland pawhin sumdawnna lamah tuar ve hle in hotel leh dawr tam tak NH-39 ami phei chu dawrtu awm loh vang a khar a ni.

Vawiin June 14, 2010 a Naga Students Federation aiawh mi panga in Prime Minister Manmohan Singh hmuh an tum hian he buaina hi vawiin ni atang hian a chhemdaih beisei ani. Nimahsela, buaina hi a kiang hlen thei ang em le?