Mizo Students Union (MSU) mi leh sa 90 an man

May 18,2010: Mizoram University-a Lecturer hna lak chungchanga thil fello a awm nia sawiin, Mizo Students’ Union (MSU) mi leh sa te chu tukin khan Luangmual-a Vice Chancellor chenna in-ah an pungkhawm a, Vice Chancellor Office kal tur an dan zui avangin an hruaitu thenkhat telin mi 90 Police-ten an man.

Heng zirlai man te hi Central Jail-ah dahluh nghal an ni a, tukina Vice Chancellor chenna in tuala an punkhawm lai hian Magistrate leh Police hotute chuan buaina lian zawk a thlen lohna tura hma la-in, MSU te hmalak dan chu dan kalh a ni tih an hrilh a, amaherawhchu MSU hotu lam te chuan MZU hotute nena inremna an lo siam tawh chu University hotute chuan an bawhchhia nia sawiin, Vice Chancellor Office kal tur chu an dang lui a, Police te hian zirlaite chu nawr sawn tuma hma la zuiin, Vice Chancellor chu an kaltlangtir a, MSU mi leh sa 90 te chu Police-ten an man zui bawk a ni.

Hetianga buaina a chhuah hnu hian chawhnu lam khan Aizawl DC hovin MSU hruaitute chu an thukhawm zui a, hetianga an inbiak hnu hian MSU lam chuan sawrkar leh MZU thuneitute hnenah an thil phût chi 5 thehlutin, MSU leh MZU hotute an inbe leh dawn a nih chuan vawiin ngeia chinfel an duh thu te, MSU mi leh sa man tak, Central Jail-a awm mek te chu thu delhkilh awm lova chhuah leh vek nise tih te a tel a, Police te chuan an mi man te hi nim vek khan chhuah leh nghalin, zanin hian sawrkar aiawhte nen inbiakna an nei zui leh a ni.
Source:misual.com