Switzerland Vang thla Part-I

Switzerland zinnan eng hun nge tha ber ang ? tiin kan thawhpuipa Europe rama engemaw chen lo awm tawh ka zawt a. Ani chuan fall (favang) hun lai hi Switzerland kal nana hun tha ber a ni. He hun lai hi thing hnah tlakkawlh hun lai a niin khua a nuam a, a ram a mawi em em a ni a ti. Favang hun laia Swine flu hri leng avangin Mumbai leh Puneah pawh mi engemaw zat an thi a, Mizo tlangval pakhat pawh Pune ah he hri vangin a borala, chuvangin ramdang zin chu sawiloh India ram chhunga zin pawh a tul tawp anih loh chuan kan hreh hle a ni. Swine Flu hri leng in reh lam a lo pan chuan Switzerland zin turin kan chhungin inbuatsaih tan ta a. Kan fanu Chhuanteii pawh Aizawla atangin kan chah thla a. October 22, 2009 zanah Mumbai chhuahsan tur kan ni. Hemi hma ni hian Swiss Consulate chuan kan fapa Sawma Visa an pe thei lo tih kan hre ta a. Kan travel agent chuan France Consulate atangin Visa dil mai turin leh Sawma chu kan chhuah tumni 22.10.2009 tlaiah France Consulate General hmaa inlan turin min rawn hrilh a. Europe ram hrang hrang te hian SHENGEN visa Europe ram 25 (EU members) tan an pe thei a.Swiss Consulate in Visa lo hnawl tawh pawh nise French Consulate chuan Visa chu min pek theih hlauh an beisei a ni. Vanneih thlak takin kan travel agent TKI MD Pu Yusuf thahnem ngaihna zarah SHENGEN visa chu France Consulate chuan tlai dar 5 velah kan fapa tan an pe thei hram a. Tichuan zan dar 12.40 Mumbai airport atanga Frankfurt pana thlawk turin kan inbuatsaih ta a.

Mumbai kan chhuah hma hian kan thian te chuan phone in min rawn bye bye hlawm a. Paris kan kal dawn tih an hriat chuan French tawngin Bon Voyage min rawn ti hlawm a. Tv Maruata pawhin Airport a kan awm laiin min rawn phone a, Bon voyage tiin min thlah a. Darkar 8 leh a chanve vel kan thlawh hnuin Frankfurt Airportah kan tuma. An Local timeah chuan dar 5 ani a, khua a lo vawt em em mai a. Bus min rawn lamtu tur chu chhun dar 1 chauha rawn thleng tur a nih avangin, Frankfurt Airport lobbyah Bus chu kan nghaka . Khawchhak lam nu pakhat hian kan bul lawkah phone in mi a be mawlh mawlh maia, anmahni miah min ngai ni tur ani anmahni tawngin min bia a, a phone chu min pe a. German tawng a thiam loh avangin han be teh min ti ni ngei tur a nia, kei chuan phone chu kan la a, Saptawng i thiam em tiin English in ka han bia a, phonea min be tu chuan anmahni tawnga min biak zui zel avang chuan chu nu hnenah chuan phone chu ka pe kir leh ta a. Ril te a tam avangin coffee te in in tuisik te kan lei a, an tuisik litre chanve Euro 2.5 (Rs. 175) in kan lei a, a to duh ngei mai. Coffee no khat pawh hetiang man bawk hi a ni a. Airport Super Market ah chuan kan bazaar a, kan thillei kenna tur bag chu man lovin min pe dawn emaw tih nak a lai chuan a man min han thing leh a, Germany ram ah chuan thil zawng zawng hian man a nei ni vek mai a awm e.

Kan Bus chu chawhnu dar khat ah a lo thleng a, Frankfurt khawpui sightseeing nei turin kan pan a. Frankfurtah hian motor a tam em em mai a, nimahselang mihring khawlaiah hmuh tur an tam lo hle thung, India ram nen chuan in opposite hlauh a ni. Chuvang ani ang an dawrkaite hian an thil zawrhte man to tak taka an chhiar te ka ti ta mai mai a.Biak in hlui tak Gothic Cathedral kan tlawh a, Theatre lar tak kan tlawh bawk a, an biakin building te chu a ropui hle mai a, khawchhak lam tourist pawh engemaw zat Frankfurtah hian hmuh tur an awm a ni.
Germany Highway: Frankfurt chu chawhnu herah kan chhuahsana , Germany chhim lam khawte reuh te Heppenham khaw panin kan kal ta a. An highway te chu a lian em em a, lane 8 leh lane 10 te a ni a, Pune Express Highway lane 6 kha ha hipa kan sawi thin nen chuan inthlau tak a ni. Europe continent ah hian an motor te hi left hand drive vek an ni a, tin keep to the right vek in motor an khalh a. England ram chauh hian keep to the left leh right hand drive hi an hmang a, chuvangin an colony India ramte chuan British ho tih dan hi kan hmang ta a ni .High way a motor tlan reng reng chuan an motor headlight chhunah pawh an on a, kan Bus Driver Michel, Belgium mi kum 77 a upa chuan Europe ram dan a ni a, Italy ramah phei chuan Head Light on hi compulsory a ni a ti. Kan driver chu a la chakin a tho thang a tha a, bungrua an unload te chu a chak em em mai a, kum 77 em chu ani dawn em ni aw ka ti a. Kan guide pa chuan a Licence ah pawh kum 77 ngei a lawm a ti a, amah pawhin a inti bawk a , a kum a sawi chu adikah ka ngai ve ta mai a.

Germany Chhim leh Switzerland hmar:Heppenham khuaah Indian Hotela zan khat kan riah hnuin Switzerland ram panin kan chhuak ta a, Heidelberg khuaah sightseeing neiin rei vak lo kan chawl a, he khua hi Stefi Graf, Tennis khel thiam khua a ni a, an in pawh Rhine luipui kam ah a awm a, zin miten an hmu duh hle a, he khuaah hian Frederick the Great an kulh ropui tak a sak pawh hmuh theihin a la ding. He khua hi Tourist ten an tlawh nasa hle.Switzerland ram panin kan kal leh a. German ram ramri kan pelh a Switzerland kan thlen chuan kawng te pawh a lo te tanin motorte pawh a lo tlem tana. Chawhnu herah Switzerland khaw pakhat Schaffhaussen kan thlenga, he khua hi khaw lian vak a ni lova, nimahse Europe rama tuikhawthla hming thang Rhine Falls and tih chu a awm a. Rhine lui hi Switzerlandah hnar neiin German ram ah a luang thla a, Holland ramah tuipui a fin a. Tunhma chuan German tan lifeline pawimawh tak a ni. He tui khawhthla hi feet 75 vel chauh a sang a ni a. Tourist ten an tlawh nasa em em a. Africa rama Niagara fall te nen chuan khaikhin chi nilo mahse Europeah na na chuan a hmingthang hle a ni. Rhine falls kan en hnuin Zurich panin kan kal a, Zurichah lian dil mawi tak Zurichsee an tih hi a awm a. Zurich khuaa michengte hi an changkangin an inthuam nalh hle a . Tlai lam ni tlak dawn suar suar ah chuan ral khat hla taka tlang mawi tak vurin a khuh var vo mai chu a hmuh theih a. Van lam han hawi ila thlawhna thlawkchhuak leh a zuitu meikhu chhum chuan Zurich tlai nitla tur chu a timawi zual hle ani.
Day light Savings: Zurich kan chhuahsan hnu darkar khat velah Lucerne kan thleng a. he khuaah hian Indian hotelah dinner kan ei a. Dinner kan ei zawh chuan min hruaitu chuan vawiin hi October thla chhunga Inrinni hnunung ber a ni. Naktuk atang hian Europe ram ah chuan an sana darkar khatin an herh hma dawn a,. Zanlai in mut hlanin in sana in herh hma thei dawn lova, chuvangin tunah khan in sana kha darkar khat in herh hma mai rawh u a ti a. Europe leh India hi darkar thum leh a chanve a inthlau kha dar li leh a chanve in hemi ni tuk atangin hian a inthlau ta a ni. Thlasik laia ni a lo tlak hma avangin an hun tihdik nan hemi ni hian an Sana darkar khatin an herh hma thina February thla tawpah an Sana chu an herh let leh thin a ni . Hei hi Day Light saving an ti bawk a.. India ramah chuan hetiang ang hian kan hun kan tihdanglam ve loh avangin thlasikah ni a tla hma em em a. Chumai bakah US khu an ram a len em avangin time zone 5 an nei a-Atlantic, Central, Eastern, Mountain leh Pacific Time. India ram chuan time zone pakhat chauh kan neih avangin kan ram thlang Bangla Desh ah dar 10 a rikin Mizoramah chuan dar 9 leh a chanve a ri chauh maia .Mumbaiah dar 8 ah ni a tlakin Aizawlah chuan dar 6 leh a chanve ah ni a tla tawh a.